ਭਾਰਤ ਸਮੇਤ ਦੁਨੀਆ ਦੇ ਕਈ ਦੇਸ਼ਾਂ ’ਚ ਡੇਂਗੂ ਦੇ ਮਾਮਲੇ ਲਗਾਤਾਰ ਵਧ ਰਹੇ ਹਨ। ਵਿਸ਼ਵ ਸਿਹਤ ਸੰਗਠਨ (ਡਬਲਯੂ. ਐੱਚ. ਓ.) ਨੇ ਕਿਹਾ ਕਿ ਵਿਸ਼ਵ ਪੱਧਰ ’ਤੇ 3.9 ਅਰਬ ਲੋਕਾਂ ਨੂੰ ਡੇਂਗੂ ਵਾਇਰਸ ਦਾ ਖਤਰਾ ਹੈ। ਇਸ ਦਾ ਅਰਥ ਹੈ ਕਿ ਦੁਨੀਆ ਦੀ ਅੱਧੀ ਆਬਾਦੀ ਇਸ ਦੀ ਲਪੇਟ ’ਚ ਆ ਸਕਦੀ ਹੈ। ਇਹ ਲਾਗ (ਇਨਫੈਕਸ਼ਨ) ਗੰਭੀਰ ਤੋਂ ਅਤਿ-ਗੰਭੀਰ ਹੁੰਦਾ ਜਾ ਰਿਹਾ ਹੈ। ਰਿਪੋਰਟ ’ਚ ਕਿਹਾ ਗਿਆ ਕਿ ਪਿਛਲੇ ਸਾਲ ਡੇਂਗੂ ਨਾਲ 7300 ਤੋਂ ਵੱਧ ਮੌਤਾਂ ਹੋਈਆਂ ਅਤੇ 65 ਲੱਖ ਤੋਂ ਵੱਧ ਮਾਮਲੇ ਸਾਹਮਣੇ ਆਏ। ਮੌਤਾਂ ਅਤੇ ਮਾਮਲਿਆਂ ਦੀ ਇਹ ਗਿਣਤੀ ਉਨ੍ਹਾਂ 80 ਦੇਸ਼ਾਂ ਦੀ ਹੈ, ਜਿਨ੍ਹਾਂ ਨੂੰ ਸੰਗਠਨ ਨੇ ਜ਼ਿਆਦਾ ਪ੍ਰਭਾਵਿਤ ਦੇਸ਼ ਐਲਾਨਿਆ ਹੋਇਆ ਹੈ। ਹਾਲਾਂਕਿ ਡੇਂਗੂ ਦੇ ਕਹਿਰ ਨਾਲ ਅਫਰੀਕਾ, ਅਮਰੀਕਾ, ਦੱਖਣ-ਪੂਰਬੀ ਏਸ਼ੀਆ ਸਮੇਤ 100 ਤੋਂ ਵੱਧ ਦੇਸ਼ ਗੰਭੀਰ ਤੌਰ ’ਤੇ ਪ੍ਰਭਾਵਿਤ ਹਨ। ਡੇਂਗੂ ਹੁਣ ਯੂਰਪ, ਪੂਰਬੀ ਭੂ-ਮੱਧ ਸਾਗਰ ਅਤੇ ਅਮਰੀਕਾ ਦੇ ਨਵੇਂ ਖੇਤਰਾਂ ’ਚ ਪਸਾਰਨ ਲੱਗਾ ਹੈ।
ਇਹ ਇਕ ਵਾਇਰਲ ਇਨਫੈਕਸ਼ਨ ਹੈ, ਜੋ ਇਨਫੈਕਟਿਡ ਮੱਛਰਾਂ ਦੇ ਕੱਟਣ ਨਾਲ ਇਨਸਾਨਾਂ ’ਚ ਫੈਲਦਾ ਹੈ। ਇਹ ਟਰੋਪੀਕਲ ਅਤੇ ਸਬ-ਟਰੋਪੀਕਲ ਜਲਵਾਯੂ ’ਚ ਪਾਇਆ ਜਾਂਦਾ ਹੈ ਭਾਵ ਸ਼ਹਿਰੀ ਅਤੇ ਅਰਧ ਸ਼ਹਿਰੀ ਇਲਾਕਿਆਂ ’ਚ ਇਨ੍ਹਾਂ ਦਾ ਨਿਵਾਸ ਰਹਿੰਦਾ ਹੈ।
