ਭਾਰਤੀ ਖ਼ੁਰਾਕ ਨਿਗਮ (ਐੱਫ. ਸੀ. ਆਈ.) ਨੇ ਪੰਜਾਬ ਨੂੰ ਕਣਕ ਦੀ ਖ਼ਰੀਦ ਤੋਂ ਬਾਅਦ ਓਪਨ ਪਲਿੰਥ (ਖੁੱਲ੍ਹੇ ਚਬੂਤਰੇ) ‘ਤੇ ਰੱਖਣ ਦੇ ਹੁਕਮ ਦੇ ਦਿੱਤੇ ਹਨ ਕਿਉਂਕਿ ਪੰਜਾਬ ‘ਚ ਜਗ੍ਹਾ ਦੀ ਭਾਰੀ ਕਮੀ ਹੈ ਅਤੇ ਇਕ ਅਪ੍ਰੈਲ ਤੋਂ ਕਣਕ ਦੀ ਸਰਕਾਰੀ ਖ਼ਰੀਦ ਸ਼ੁਰੂ ਹੋਣ ਵਾਲੀ ਹੈ।
ਕਣਕ ਦੀ ਖ਼ਰੀਦ ਨੂੰ ਲੈ ਕੇ ਆੜ੍ਹਤੀਆਂ, ਐੱਫ. ਸੀ. ਆਈ. ਅਤੇ ਖ਼ਰੀਦ ਏਜੰਸੀਆਂ ਦੇ ਅਧਿਕਾਰੀਆਂ ਨਾਲ ਬੈਠਕ ਹੋ ਚੁੱਕੀ ਹੈ। ਐੱਫ. ਸੀ. ਆਈ. ਨੇ ਓਪਨ ਪਲਿੰਥ ‘ਚ ਕਣਕ ਰੱਖਣ ਦੇ ਹੁਕਮ ਉਸ ਵੇਲੇ ਜਾਰੀ ਕੀਤੇ ਹਨ, ਜਦੋਂ ਕੇਂਦਰ ਸਰਕਾਰ ਦਾ ਸਾਫ਼ ਨਿਰਦੇਸ਼ ਹੈ ਕਿ ਅਨਾਜਾਂ ਨੂੰ ਬੰਦ ਗੋਦਾਮਾਂ ‘ਚ ਰੱਖਣਾ ਜ਼ਰੂਰੀ ਹੈ ਤਾਂ ਜੋ ਖ਼ਰਾਬ ਮੌਸਮ ਦਾ ਅਸਰ ਨਾ ਪਵੇ। ਕੇਂਦਰ ਨੇ ਅਗਲੇ ਸਾਲ ਤੱਕ ਓਪਨ ਪਲਿੰਥ ‘ਤੇ ਅਨਾਜ ਸਟੋਰ ਕਰਨ ਦੀ ਵਿਵਸਥਾ ਖ਼ਤਮ ਕਰਨ ਦੀ ਸਮਾਂ ਹੱਦ ਤੈਅ ਕੀਤੀ ਹੈ।
ਐੱਫ. ਸੀ. ਆਈ. ਵਲੋਂ ਪੰਜਾਬ ‘ਚ ਨਵੇਂ ਸਾਈਲੋ ਬਣਾਉਣ ਲਈ ਟੈਂਡਰਿੰਗ ਅਤੇ ਕਮੀਸ਼ਨਿੰਗ ਦੀ ਪ੍ਰਕਿਰਿਆ ਜਾਰੀ ਹੈ। ਦੱਸਣਯੋਗ ਹੈ ਕਿ ਪੰਜਾਬ ‘ਚ ਕਣਕ ਦੀ ਆਮਦ ਨੂੰ ਲੈ ਕਿ ਤਿਆਰੀਆਂ ਮੁਕੰਮਲ ਕਰ ਲਈਆਂ ਗਈਆਂ ਹਨ ਅਤੇ ਸ਼ੁਰੂਆਤੀ ਸਮੇਂ ‘ਚ ਕਣਕ ਦੀ ਆਮਦ ਲਈ 417 ਮੰਡੀਆਂ ਨਿਰਧਾਰਿਤ ਕੀਤੀਆਂ ਗਈਆਂ ਹਨ।
