ਵਿਦੇਸ਼ਾਂ ਦੀ ਰੁਝੇਵਿਆਂ ਭਰੀ ਜ਼ਿੰਦਗੀ ‘ਚ ਆਪਣੇ ਪਰਿਵਾਰਕ ਫਰਜ਼ ਨਿਭਾਉਣੇ ਵੀ ਕਈ ਵਾਰ ਔਖੇ ਜਾਪਦੇ ਹਨ। ਪਰ ਬਹੁਤ ਥੋੜ੍ਹੇ ਜਨੂੰਨੀ ਲੋਕ ਅਜਿਹੇ ਵੀ ਹੁੰਦੇ ਹਨ ਜੋ ਪਰਿਵਾਰਕ ਜ਼ਿੰਮੇਵਾਰੀਆਂ ਦੇ ਨਾਲ ਨਾਲ ਸਮਾਜ ਪ੍ਰਤੀ ਫਰਜ਼ਾਂ ਨੂੰ ਵੀ ਅਣਦੇਖਿਆ ਨਹੀਂ ਕਰਦੇ। ਯੂਕੇ ਦੀ ਧਰਤੀ ‘ਤੇ ਮੁਕੇਸ਼ ਮਹਿਮੀ ਤੇ ਸੁਨੀਤਾ ਮਹਿਮੀ ਦਾ ਨਾਂ ਉਂਗਲਾਂ ਦੇ ਪੋਟਿਆਂ ‘ਤੇ ਗਿਣੇ ਜਾਣ ਵਾਲੇ ਉੱਦਮੀ ਲੋਕਾਂ ਵਿੱਚ ਆਉਂਦਾ ਹੈ।
ਇਸ ਜੋੜੇ ਵੱਲੋਂ ਪੰਜਾਬੀ ਸੱਭਿਆਚਾਰ ਦਾ ਸ਼ਮਲਾ ਉੱਚਾ ਰੱਖਣ ਦੇ ਕਾਰਜਾਂ ਦੀ ਲੜੀ ਤਹਿਤ ਯੂਕੇ ਨੈਸ਼ਨਲ ਗਿੱਧਾ ਕੰਪੀਟੀਸ਼ਨ ਕਰਵਾਉਣ ਦੀ ਮੁਹਿੰਮ ਚਲਾਈ ਹੋਈ ਹੈ। ਬੀਤੇ ਦਿਨ ਟੈਲਫੋਰਡ ਵਿਖੇ ਤੀਜਾ ਯੂਕੇ ਨੈਸ਼ਨਲ ਗਿੱਧਾ ਮਹਾਂਮੁਕਾਬਲਾ ਕਰਵਾਇਆ ਗਿਆ ਜਿਸ ਵਿੱਚ ਯੂਕੇ ਦੇ ਵੱਖ-ਵੱਖ ਸ਼ਹਿਰਾਂ ‘ਚੋਂ ਆਪਣੀਆਂ ਗਿੱਧਾ ਟੀਮਾ ਲੈ ਕੇ ਮਾਣਮੱਤੀਆਂ ਪੰਜਾਬਣਾਂ ਹੁੰਮ ਹੁਮਾ ਕੇ ਪਹੁੰਚੀਆਂ। ਪ੍ਰੇਮ ਵੈਡਿੰਗ ਡੈਕੋਰੇਸ਼ਨ ਟੈਲਫੋਰਡ ਦੇ ਵਿਸ਼ੇਸ਼ ਪ੍ਰਬੰਧ ਹੇਠ ਹੋਏ ਇਸ ਗਿੱਧਾ ਮਹਾਂਮੁਕਾਬਲੇ ਵਿੱਚ ਪਹਿਲਾ ਸਥਾਨ ਗਿੱਧਾ ਸ਼ੌਕੀਨ ਜੱਟੀਆਂ ਦਾ ਸਾਊਥਾਲ (ਲੰਡਨ) ਦੀ ਝੋਲੀ ਪਿਆ। ਦੂਜਾ ਸਥਾਨ ਮਜਾਜਣਾਂ ਟੈਲਫੋਰਡ ਨੂੰ ਹਾਸਲ ਹੋਇਆ ਜਦਕਿ ਤੀਜੇ ਸਥਾਨ ‘ਤੇ ਵੁਲਵਰਹੈਪਟਨ ਦੀ ਨੱਚ ਮਜਾਜਣ ਟੀਮ ਤੇ ਬੈਡਫੋਰਡ ਦੀ ਸੁਨਹਿਰੀ ਪਿੱਪਲ ਪੱਤੀਆਂ ਟੀਮ ਰਹੀਆਂ।
